Schitour am Unsinnigen Donarsdåg mitm ABC~Loisei ins Watzmannkar
Am Unsünnign Donarsdåg, an dem de Sunn/Sünn wirklich wenig zum seng war, im Gengsatz zum Dåg drauf, war bei uns amoi wieda Kar~frei~dåg und so sann mia zwoa glorreichen Schilosophen vom Hammerschtiel aus aufn K3 (oiso as 3. Kind) und dees war haargenau am 20.02.2020 (wås für a genials Datum), a baar Stund lang auffegrutscht. Und weils do oftmois ah relativ gråd dahi gäht, hamma wieda gscheid vui Zeit zum Schilosophiern ghabt, da ABC~Loisei und i...
Der hoaßt übrigens aso, weil er ned nur da A~Loisei, sondan ah da B~Loisei und da C~Loisei is...wenn ned sogar da Omega~Loisei...
Wås füra Unterschied zum Diensdåg, wo ma de Harscheisen scho glei vo Anbeginn der Tour braucht hamm. Aus dera Erfahrung heraus, håb i's desmoi ned im Keller vom Rucksack installiert, sondan im Decklfach...aba siehe da, dees war braktisch obsolet. Aba dees is woi so, wia midm Rengschirm:
Hostn dabei, brauchstn ned, hostn ned dabei, dadstn braucha... vo dem her, sann mein Harscheisen künftig nur no im Decklfach! Blääd samma ja ned, gä! ;-)
Wenn ah da Neuschneeleugner ABCDEFGHIJKLMNOPQRSTUVWXYZ~Loisei de dezentn Schneeflöckal am Anfang no ois Schneebrääsl interpretiert håd, wara dann schpaadastns mittn im Kar, zwischn Watzmo, Watzfrau und de Schraatzn, überzeigt davo, dass an Neischnee tatsächlich gibt und dees koa Woipadinga~Saga is...
Und so hamma vo da Woidgrenz bis auffe aufn K3 erstaunlich vui Neischneemengen vorgfundn, de uns beim Obäfahrn den absoluten und olle erfahrenen Diafschneefahrern bekanntn, Buivaschneerausch verschafft håd. Guad an dem is, dassa Xsundheitlich ned schädigend is und ah nix kost, außa da Kraft, durch eahm mit de Schi obäz'fahrn...
Der Schnee war teilweise so diaf, dass ma scho fast an Schnorchel braucht hädd...kaum z'glaubm bei dem Winter!
Aba de berühmte Watzmann~Woikn, wega dera ma angeblich wissn soi, dass schee Weeda werd, håd si hoid doch recht ausdauernd üba da ganzn Familie Watzmann ghoitn und si ausgiebig ausgschneibt...
Aba jezad erstamoi wås zum Aufstieg, weil de Abfahrt ja bekanntlich erst schpaada kimmt....zumindest in de meistn Fälle...
Unmittlbar nach Hammerschtui warn nämlich glei amoi unsere ausgeprägten Spurenleserkenntnisse gfrågt. Weil do doch tatsächlich Zwoa, de den Mangel an Schnee, bzw. Unterlag komplett ignoriert hamm, mit eahnanä Schi auf dem ziemlich ausg'aperten Weg entlanggrutscht sann, wås uns hoid scho erst amoi gscheid vawundert håd (siehe Buidl nebmdro!), weils für die Felle gwiss ned so förderlich war. Aba mia sann dann durchs intensive Nachsinnieren, wofür ma bei dem langa Hatscha gnua Zeit håd, drauf kemma, dass sasi möglicherweise g'opfert hamm, den wenign Schnee, der doch no vorz'findn war, weida auffez'drong, dass OM wieda mehra is. Denn der håd si nämlich scho sauba an de Felle one'bickt, wia ma ah auf dem Foto sieght.
Aba vielleicht wars ah einfach nur a Unsinn, der ja am Unsinnign Donarsdåg hoid einfach amoi vorkemma ko in da ganzn Narretei...nix gwiss woaß ma ned...und do is sogar da A~Boar~iginal~Spurenleser a weng überfordert...
Ansunstn hamma no a E~Bike~Spur und a baar Fuaßgänger~Spuren entdeckt, wobei do woi oana midm foischn Fuaß aufgschtandn is, wia as geschulte Auge des erfahrenen Spurenlesers leicht erkenna håd kenna.
Eigentlich hädd ma ja heit a Wirtshaustour vorghabt, aba olle Wirthaisa, an dene ma vorbei kemma sann, hamm zua ghabt, warn ned z'findn oda mia hamm as Codewort fürn Eingang ned gwussd...und bei oam war ah no abgschnittne Krawattenpflicht.
Dass'Dz wissts, an wiavui Wirtshaisa mia vorbei kemma sann, wui i Eich de amoi olle aufzäyhn...und vamut amoi, dass de Wenigstn olle kennan:
Losganga is midm Hammerstiel~Baisl, wås völlig überfüllt war und dees scho um 10ä Vormiddog, saxndi!
D'Schappachoim håd ah vaschlossn ausgschaugd und ned zur Einkehr ei'glon.
Beim Benzinkurvnwirt hamma an Eingang ned gfundn, obwoi ma ganz klar in olle uns bekanntn Sprachen "Freind" xågtd hamm...håd nix gnutzt, es håd si nix aufdo, beim ois Feysn getarnt Wirtshaus!
As Gasthaus Lärchenwirt, obahoib vo da Bucklpistn~Oim, håd Betriebsurlaub ghabt, beim Untan Karwirt war Krawattenpflicht, beim mittlern Karwirt war a Betriebsfeier vo de Watzmanndln und da Obere Karwirt håd In~Wend~Tour ghabt.
Zum Watzmannkaser samma erst garned ummi, weil der eh in de Woikn war und an K3~Pub aufm Drittn Kind hamma vor lauter Neischnee, dens laut am Loisl ja eigentlich übahauptned gibt, erst garned gfundn. Und so wars erstamoi nix midm Einkehrschwung auf da Tour...und dees ganze Buiva, wås ma dabei ghabt hamm, hamma garned ausgebm kenna...seybst da Buivaschnee war uns in dera Hinsicht ned hilfreich...erneut...saxndi!
Übrigens is uns bei genauerer Betrachtung vom K4, ah ois 4. Kind oda Watzmann~Jungfrau bekannt ~ wobei i mi do scho a weng fråg, wer dees nachgeprüft håd...und voroim ah wo? ~ aufgfoin, dass dees in Wirklichkeit a getarnte, bzw. im Einklang mit da Natur drumherum, sehr guad integrierte Seilbahnbergstation vo da Watzmann~Gletscherbahn is, de durch de Eröffnung vom Nationalpark und ah aus Ermangelung an Gletscher, nia eröffnet worn is.
Wås nadialich den Nachteil ghabt håd, dass seybst as Seilbahnlokal ned geöffnet war und mia aso einfach partout ned zu unsam wohlersehenten Bier kemmma sann.
Da Alphabeth~Loisei war zwischnzeitlich eh a weng irritiert, oba ned gråd doch obahoib z'Grindelwoid in da Schweiz waarad und håd gemutmaßt, dass da Watzmann da Eiger is und die Watzfrau da Mönch, nachdem ma ja aufd Jungfrau zuaganga sann. Demnåch waarad ma ja direkt aus Jungfraujoch auffe...aba de Bahnstation hamma ned gfundn. Außadem hädd ja dann de Watzfrau eha a Nonne sei miaßn...
Is scho ois oiwei a weng vawirrend im Nebe' und der is je weida ma uns am K3 (oda vielleicht ah doch am Jungfraujoch) g'nähert hamm, oiwei mehra worn, wia ah de Flöckal...
Wås nachad unsa Gipfelglück generell betrifft, muaß ma song, dass ma ned xeng håd, ob ma xeng hädd, dass ma nix seng dad, wenn ma wås xeng hädd.
Und so wiss ma ah garned genau, wia weit untahoib vom eigentlichn Gipfä mir tatsächlich warn, weil ma ned weida ganga sann ois de 3 anwesendn Ultra~Einheimischn vom Untan Hammaschtui, de a guadä Zeit vor uns auffe kemma und dann ah a baar Minutn vor uns obägfahrn sann. De hamm mit mir a baar Stund vorher unt zwischn Hammaschtui und Schappach~Kreizung a ganz a bsundarä Gaudi ghabt, weils mi beim äußerst dringenden Ballast abwerfa überrascht hamm. Dees håd eahna glei mehrare dreckige Lacha entlockt. Naja, ois Lach~Medizinmann muaß ma hoid ah manchmoi seytsame Aktionen bringa, dass ma as Zwerchfey vo de Leit zum Beben bringt...
Auf jedn Foi kå ma scho gern amoi auf a guadä Aussicht vazichtn, wenn ma dafia soa geniale Buivaschnee~Abfahrt serviert griagd, dadimoana...
Bevor mia aba obägfahrn sann, is no oane auffe kemma, de mi glei dakennt håd und gmoant håd, dass sie meine etwas ungewöhnlichn, berüchtigtn Berüchte im Fratznbiachä richtig griabig find.
Auf Anraten vom A~Loisei und olle sonstign Alphabethischn~Loisei's, werd i künftig amoi eha koane Klarnamen nenna, wenni ned de ausdrückliche Genehmigung griagd håb, damit i weda eifersüchtige Ehefraun/Ehemänner, mißgünstige Chefs oder Arbeitskollegen aufn Plan ruaf, bzw. gegad DSGVO (=Deitsche Schifahrer Gseyschaft Vor Ort) zu vaschtoßen. Desweng war dees im Berücht vorerst einfach amoi Oane, de in de Gruppn "Soizburga Schitourngeher" und "Alpine Touren Berchtsgån" dabei is. Obdz mehra erfahrts, wer dees war, kimmt drauf o, obs einwilligt, in dem abermals berüchtigtn Berücht erwähnt z'wern.
Jednfois håbi mit ihra an gschmeidig~lustign Ratsch ghabt, der no länga ausg'artet waarad, wenns am Loisei mitsamt Alphabeth ned a wengal z'frisch am Gipfä, an dem ma, zwenx ungewissen Wächtenverhaltens, gar ned so richtig OM warn, worn waarad. Ah da Gipfäwirt håd wieda amoi ned gscheid ei'ghoazt... und ausgschenkt håda ah nix...zefix!
Und so samma nachad in traumhaft~gschmeidigä Schwingal, ah wenn ma wenig xeng hamm, reglrecht obäg'schwebt Richtung Unterer Karwirt.
Ab do hammma dann scho oiwei wieda amoi an Harschkontakt ghabt und de Neischneeauflage war do dann ah deitlich geringer...hamma ja dee lokale Watzmannwoikn wieda valassn...
Vorbei am Gasthaus Lärchenwirt, hammma dann de Bucklpistn erreicht, de scho a weng grenzwertig war. Oiso wenn do no a baar mehra Leit durchäfahrn, werds woi eha koa Gaudi mehr, insbesondere für de Schi, sofern ned no mehra dees vom Himmi kimmt, wås da Loisei so vehement leugnet.
Im untan Teil hamma dann zwoa droffa, dee uns vom Stahlhaus her wohlbekannt warn, aba aus Datenschutz~ und sonstig, oben genannten Gründen, wern üba de zwoa ah koane weiteren Details veröffentlicht. Aba gfreit hamma uns scho, dass ma uns droffa hamm...
Aufm Ziehweg bis zum Benzinkurvnwirt wars a saubanä Rutscherei und do werd ma woi demnäxt ah wieda seine Schi drong miassn, wenns aso weida gäht...
Nåch da Benzinkurvn samma an da Straß entlang grutscht und do war dann aosa Bremsschnee, dass ma moana hädd kenna, ma hädd die Felle no unta de Schi ghabt, wås aba definitivly ned da Foi war.
Nichtsdestotrotz håds glangt, dass ma fast zur Schappachkreizung hig'rutscht sann und somit war as zwischnzeitliche Angebot vom Forstpraktikantn, der uns o'botn håd, midm Jeep vo seim Chef uns a Schtickal mitz'nehma ~ wås der uns woi häxtwahrscheinlich eha ned o'botn hädd ~ ah eha a obsolete Gschicht... Nett wars ja scho, aba woi ah ned so ganz realistisch...der muaß woi no vui lerna, der Praktikant...dadimmoana...
Danåch war hoid wieda Schidrong und Latschn oxågd...und wia ja vui wissn, de do schoamoi in da Frühjahrszeit unterwex warn, ziagt si dees, vorbei am Marterl vom Dschenda Jiesäs (oda is doch de Heilige Conchita?), scho immens dahi, bis ma endlich wiada beim Hammerschtui~Baisl o'kimmt.
Dees war oiwei no völlig überfüllt und so samma dann doch liaba zum Brennerbrai z'Biewie (= Bischofswiesen) ummig'fahrn und hamm do unsan wohlverdienten und lang scho ersehnten Einkehrschwung absolviert... Mei, as Wieninger Bier is hoid a Gschmacksach, aba as Essn do is scho sauguad...
Zum Glück war ma no friah gnua dro, dass uns ned da unsinnige Weiberfasching ereilt håd...wobei ma ja eh koane Krawattn umghabt häddn...
Sodala, jezad wisst wieder ungefähr Bescheid, wias am 20.02.2020 auf unsana Tour ins Kar so war, wås aba woi boid garnimma sovui bringt, weil ja scho recht boid amoi ois wieda ganz andas is...aba wenndz mit meina berüchtigtn Berüchterstattung trotzdem a Gaudi habtz, dann håd si der ganze Aufwand eh scho g'lohnt...
Auf jedn Foi hammas desmoi wieda voi guad dawischt und dees håd de "Schmaach vom Jennersattl", wias da Loisei tituliert håd, wieda mehr ois ausglicha...
Dass glei olle Wirtshaisa am Weg bei dem wundascheena Weeda und ah no in da Ferienzeit zua ghabt, bzw. uns an Eintritt vawehrt hamm, håd uns zwar ned so begeistert, de Buivaschneeabfahrt aba umso mehra...
Mit weiteren schilosophischen Schandtaten und berüchtigten Berüchten und keineswegs Gerüchten, ist zu rüchnen und do deafts Eich jezad scho, so wia i ah, drauf gfrein...schau ma moi, wås mia no so ois dalebm in dem vermeintlichn Winter, der si dees Jahr leider all zu häufig in Zurückhaltung übt...wås aba zum Glück lokal im Kar ned da Foi war...JUUUHUUUIII !
